Leikskólinn okkar

Leikskólinn Víðivellir var formlega tekinn í notkun 28. febrúar 1977 og þá sem nýtt dagvistunarheimili sem ætlað var að yrði opið alla daga frá kl. 7:30 – 18:30, nema laugardaga. Dagvistunarheimilið átti að leysa þarfir forgangshópa í bænum um dagvistunarpláss. Opnunin þótti marka mikinn og merkan áfanga í dagvistunarmálum í Hafnarfirði og um að ræða fyrsta barnaheimilið sem bærinn starfrækti. Þá hafði bærinn rekið dagheimili að Hörðuvöllum um áratuga skeið í samvinnu við verkakvennafélagið Framsókn. Hvatamenn að byggingu Víðivalla voru Lionsmenn og konur í kvenfélaginu Hringnum.

Leikskóli án aðgreiningar

Leikskólinn Víðivellir hefur verið rekinn sem skóli án aðgreiningar frá árinu 1992 og unnið hefur verið með börn með sérþarfir og fatlanir á ýmsum sviðum. Rúmgóður hreyfisalur er í skólanum og hefur rík áhersla verið lögð á hreyfingu og holla lífshætti í daglegu lífi nemenda og starfsmanna skólans. Leikskólinn hefur í tvígang fengið viðurkenningar fræðsluráðs Hafnarfjarðarbæjar fyrir fagmennsku og skólaþróun í skólanum og tilnefningu Nýsköpunarverðlauna í opinberri þjónustu og stjórnsýslu.

Í dag eru 126 börn á Víðivöllum á 5 deildum, Ungadeild, Kisudeild, Kanínudeild, Bangsadeild og Ljónadeild. Börnin eru frá 9 mánaða til 6 ára. Á Víðivöllum starfa 44 starfsmenn.